"Isipon ta"

Kan ako joven pa, haros ara-aldaw nagigimatahan ko an sarong pang-agang pagbabareta sa radyo- sa istasyong DZGE. Ini an paboritong gibihon kan sakuyang mga magurang pagkakaaga - an magdangog sa istasyon na ini. Haros ngani iyo na ini an minagimata sakuya pagkaaga. Pagluwas ko sa kwarto, maaabutan ko na kaiyan an sakuyang ama na nagkakape habang an sakuyang ina naprepreparar kan samuyang pamahawan. Pag medyo napakusog an boses ko sa pakikipag-ulay sa sakuyang ina, giromdom ko na minasitsit kaiyan an sakuyang ama asin minasinyas sakuya na dae magribok ta sabi nya, "naghihinanyog kita kan bareta". Alagad sa programa na pirmi ming dinadangog, an sakuya mang personal na paborito itong panghuring parte kaini na kung sain minapresentar an announcer kan sarong importanteng isyu na napapanahon, pagkatapos minatukar ini kan saiyang mang opinyon manungod sa isyu nganing nabanggit. Sa katapustapusi kan saiyang diskusyon minaimbitar siya sa mga paradangog na magpatisipar sa urulay sa paagi kan paghorop-horop sa mga bagay na saiya pa sanang nasabi.

"Isipon ta"

Iyo iyan an pirmi nyang sinasambit, sa saiyang boses na malagting (tama an Bikol ko?) asin ipit, pagkatapos kan saiyang komentaryo sa radyo. Yan an duwang tataramon na pagmati ko pwedeng maituturing ta nang "iconic", in its own right as far as Bicol culture is concerned probably, arog kan iba pang famosong mga linya na enot tang naengkwentro sa radyo asin telebisyon. Halimbawa digdi baga an "You're fired!" kan sikat na Amerikanong negosyanteng si Donald Trump (kapangaran ko asin saro sa mga idolo kong negosyante); an "Let's get it on!" na pinauso kan referee kan Ultimate Fighting Championship (UFC) na si "Big John" McCarthy o an "Let's get ready to rumble!" kan bistadong ringside announcer na si Michael Buffer; yaon man dyan an "Magandang gabi...bayan!" ni Noli de Castro, an "Just do it" kan Nike, "Handa na ba kayo?" ni Korina Sanchez, asin an "Hoy, gising!" ni Ted Failon, asin iba pang mga linya na tumatak na sa satuyang collective consciousness, ika nga. Kung may maisip pa kamo, paki-dagdag na lang po nindo.

Going back. Ngonyang mga panahon dae na ako nakakadangog sa DZGE na an signal pala, kulibat ko lang, abot hanggang Aklan (nasabi ko ini nin huli ta kan minsang nagbakasyon kaya ako duman asin sa Boracay, nagdadangog kami digdi). Pag ako nasa Naga, sa DWNX na ako nakakadangog miski ngani dae man ara-aldaw nin huli ta sa kasibotan sa trabaho. Iyo, makunswelo an NX Chika ni Joe Osabal asin mas makunswelo pag nakakanta na siya nin "Happy Birthday" sa mga birthday celebrants, magayon magdangog sa mga intelihenteng komentaryo na Ed Ventura asin manager Al Ubańa, pero paminsan-minsan, nagigiromdoman ko itong mga panahon na nagdadangog kami sa boses kan an announcer na ito pag kaaga, asin minaantisipar sa isyu na saiyang tutukaron sa aldaw na ito. Sa saiyang pagtukar, kami nanggad napapahihinanyog, napapahihimate, nadidisturbo, naaangot, nanghihinayang, minsan nagduduwang-isip, alagad pirmi kaming sigurado na matatapos an saiyang litaniya sa mga linyadang masara kan diskusyon; mabukas kan aldaw asin dakul pang pataratara...

"Isipon ta!"


PS:

Kun dae pa nindo nabasa, basahon nindo an post ni Mayor Jesse na ini, ta siguradong mapapaisip ka arog kan iba niya pang mga posts. Welcome pala saimo mayor digdi sa blogopshere.

Ako, dae lang napaisip, napa- "tsk-tsk" pa. Kun arog na talaga kaiyan an sistema, aba! Pasarahin na baya kita!?

Isipon ta!